Димаштың америкалық тыңдарманы әншіге ерекше сыйлық жасады
Қазақ әншісі Димаш Құдайбергенге америкалық Сильвия Сандовал есімді тыңдарманы ерекше тарту жасады.
Бұл туралы Димаш Инстаграмдағы парақшасында жазды.
«Бүгін мен үшін керемет күн болды! Америкалық Сильвия Сандовал атты тыңдарманым маған тосын сый жасады! Ол кісі 1994 жылы, 24 мамырда, дәл мен дүниеге келген күні әлемдік поп-музыка королі Майкл Джексонның өзінен қолтаңба алған екен. 24 жылдан кейін көзінің қарашығындай сақтап келген ұлы артистің қолтаңбасы қойылған суретті үлкен тебіреніспен маған сыйға тартты! Майкл қағазды тегістеп, ыңғайлап жатып, байқамай жыртып алған екен -«oops, sorry me» деп жазып, қол қойып беріпті. Сыйлығыңыз үшін көп рахмет, Сильвия апай», — деп жазды Димаш Инстаграм парақшасында.
Айта кетсек, Қытайда былтыр өткен «I am а Singer» байқауының финалында Димаш Құдайберген Майкл Джексонның әнін орындаған болатын. Әлемге әйгілі әншінің бірнеше әнін біріктіріп орындаған Димаштың өнеріне жанкүйерлері тәнті болған еді.