Қыркүйектен бастап жамбылдық мұғалімдердің жалақысы өскен

Биылғы оқу жылынан бастап жамбылдық мұғалімдердің жалақысы өскен. Бұл туралы облыс әкімі Асқар Мырзахметовтың Елбасы Н.Ә.Назарбаевтың Қазақстан халқына Жолдауына арналған облыс активі жиналысында мәлімдеді.

– Мемлекет басшысы  ұстаз беделін арттыру мәселесін ұдайы көтеріп келеді. Жолдауға сәйкес келесі жылы «Педагогтардың мәртебесі» туралы Заң қабылданады. Заңда педагогтың әлеуметтік мәртебесін көтеретін стимулдар, оқу жүктемесін азайту, қажетсіз тексерістерді азайту мәселелері көрініс табатын болады.

Биыл педагогтарға ұлттық біліктілік сынағы енгізілді. Аттестациялау нәтижесінде облыстың 2 мыңнан астам мұғалімінің лауазымдық жалақысына 30-дан 50 пайызға дейін қосымша үстемақы биылғы 1 қыркүйегінен бастап төленуде, – деді Асқар Исабекұлы.

Сонымен қатар, жаңартылған білім беру мазмұны бойынша сабақ беретін 16 мыңнан астам (65%) мұғалімнің жалақысы 30 пайызға көбейген.