«Келешек мектептері» жобасы аясында салынған мектепте баспасөз туры өтті

Бүгін Байзақ ауданында «Келешек мектептері» ұлттық жобасы аясында салынған №7 орта мектепте ашық есік күні өткізіліп, журналистердің баспасөз туры ұйымдастырылды.
Сарыкемер ауылында орналасқан бұл заманауи мектеп 600 оқушыға арналған. 2024 жылдың 1 қыркүйегінде қолданысқа берілген білім ошағында бүгінде 72 педагог қызмет етеді. Жаңа мектептің материалдық-техникалық базасы қазіргі талаптарға толықтай сай. Мұнда 35 оқу кабинеті, 132 орындық мәжіліс залы, 176 орындық асхана, әртүрлі көлемдегі екі спорт залы, екі лингафон кабинеті, сондай-ақ химия, физика және биология пәндеріне арналған зертханалар жабдықталған. Бұдан бөлек, 16 орындық оқу залы бар кітапхана, екі компьютер кабинеті және ұлдар мен қыздарға арналған арнайы шеберханалар бар.

Ашық есік күніне ата-аналар, қонақтар және бұқаралық ақпарат құралдарының өкілдері қатысып, мектептің мүмкіндіктерімен танысты. Қонақтар оқушылардың оқу жетістіктері мен шығармашылық жұмыстарын тамашалап, балаларға арналған ойын-сауық бағдарламасына куә болды.

Іс-шара барысында мектеп директоры Гүлмира Әуесбайқызы сөз сөйлеп, жаңа білім ордасының артықшылықтарын атап өтті: «Бұл мектеп – балаларымыздың сапалы білім алуына жасалған үлкен мүмкіндік. Біз ұстаздар қауымы оқушыларға тек білім беріп қана қоймай, олардың шығармашылық және зияткерлік қабілеттерін дамытуға бар күшімізді саламыз. Заманауи жабдықталған кабинеттер мен зертханалар жас ұрпақтың жан-жақты дамуына жол ашады. Ең бастысы – балаларымыздың қауіпсіз әрі қолайлы ортада оқуы қамтамасыз етілген», – деді ол.

«Келешек мектептері» ұлттық жобасының басты мақсаты – үш ауысымды оқытуды жою, апатты мектептердің мәселесін шешу және балалардың сапалы білім алуына қолайлы, қауіпсіз жағдай жасау. Байзақ ауданындағы жаңа мектеп – осы мақсаттардың жүзеге асқан жарқын үлгісі.

Айта кету керек, өңірде жоба аясында бүгінгі күнге дейін 4 мектеп пайдалануға берілген, 3 мектеп жыл соңына дейін ашылады.