Бүгін «Taraz – Аspara fashion week» сән апталығы ашылады

Облыс әкімдігі туризм басқармасының ұйымдастыруымен қазан айының 8-12 аралығында  «Taraz – Аspara fashion week» халықаралық сән апталығы өтпек. Оған Италия, Үндістан, Голландия, Қытай, Франция мен Ресейден сынды барлығы 19 мемлекеттен сән саласының саңлақтары келеді деп күтілуде. Белгілі сәнгерлердің көрсетілімдерінен басқа, «Taraz – Aspara fashion week» аясында халықаралық дизайнерлер байқауыда өтеді.

Тарихы 2000 жыл тереңдікте жатқан көне Тараз жерінде заманауи, ауқымды сән апталығының өткізілуі туристік әлеуетіміз жайлы ақпаратты таратуға үлкен мүмкіндік болып отыр.

— Бұл күндері қаламызға 3 мыңға жуық турист келеді деп күтілуде. Олардың ішінде туризм саласының халықаралық деңгейдегі білікті мамандары бар. Мәселен, «Taraz – aspara fashion week» халықаралық сән апталығына  19 мемлекеттен 30- дан астам дизайнер қатысуға ниет білдірген. Олардың қатарында «Сербия сән апталығының» президенті Светлана Хорват, «Германия сән апталығының» президенті Катарзина Стеванов,  «Милан сән апталығының» президенті Марианна Мишели, американдық «FNL Network» телеарнасының директоры Rokko Leo Gaglioti,  «Болгария мисі» байқауының жеңімпазы Вероника Стеванова және тағы да басқа тұлғалар бар. Сонымен қатар сән апталығының салтанатты ашылуына мелекеттік хатшы Гүлшара Әбдіхалықова мен Өзбекстан премьер-министрінің орынбасары Т.Нарбаеваның қатысуы күтілуде.  Осының өзі Таразда өтетін сән апталығының деңгейі қаншалықты жоғары екендігін аңғартады. Сондықтан да дәл қазіргі таңда дайындық жұмыстары да өте жоғары деңгейде жүргізілуде. Бұл біз үшін барымызды көрсетудің үлкен мүмкіндігі,- дейді облыс әкімдігі туризм басқармасының басшысы Қарлығаш Аралбекова.

Жалпы, сән апталығы аясында облысымыздың шағын және орта бизнесі 70 миллионға жуық пайда табады деп күтілуде. Сонымен қатар өзара әріптестік туралы халықаралық 7 және республикалық деңгейде 5 меморандумға қол қойылады деп жоспарлануда.