«Әйел өмірі үшін»: Жамбылда медициналық тексеру мен ашық кездесулер қатар өтуде
Жамбыл облысында «Әйел өмірі үшін» республикалық ақпараттандыру айлығы аясында әйелдер денсаулығына арналған профилактикалық жұмыстар күшейтілді. Шалғай ауылдарға жылжымалы медициналық кешендер барып, тұрғындар қажетті диагностикалық тексерулерден өтсе, аудандарда дәрігерлермен ашық кездесулер мен «Ашық есік» күндері ұйымдастырылды. Бұл жұмыстарға «Әділет» партиясының аудандық филиалдары да атсалысты.
Ауыл тұрғыны үшін медициналық тексеруден өту кейде дәрігерге жазылудан бұрын жол мәселесін шешуді талап етеді. Әсіресе шалғай елді мекендерде қажетті маманға немесе диагностикалық құралға қол жеткізу үшін аудан орталығына баруға тура келеді. Осы тұрғыдан алғанда, медициналық көмектің тұрғынның өз ауылына баруы профилактикалық тексерулерді қолжетімді етудің бір жолына айналып отыр.
Осы бағытта Жамбыл облыстық көпбейінді онкология және хирургия орталығының жылжымалы медициналық кешені Жуалы ауданының Қошқарата және Күреңбел ауылдарына барды. Нәтижесінде ауыл тұрғындары өз елді мекенінен шықпай-ақ бірқатар диагностикалық тексеруден өтуге мүмкіндік алды.
Екі ауылда 95 адам компьютерлік томографиядан, 92 тұрғын ультрадыбыстық зерттеуден, 34 әйел маммографиядан өтті.
Маммография мен басқа да диагностикалық тексерулердің ауылға дейін жетуі әйелдердің денсаулығына уақытылы көңіл бөлуге мүмкіндік береді. Мұндай көшпелі формат әсіресе аудан орталығынан шалғай орналасқан елді мекен тұрғындары үшін уақыт пен жол шығынын үнемдеуге жағдай жасайды.
Жылжымалы медициналық кешеннің жұмысы мұнымен тоқтамайды. Медициналық тексерулер 9 қазанда Бәйтерек ауылында, 12–15 қазанда Бауыржан Момышұлы ауылында, 16–17 қазанда Қарабастау ауылында жалғасады.
Ал әйелдер денсаулығына қатысты профилактикалық жұмыс тек медициналық кешеннің көшпелі тексерулерімен шектеліп отырған жоқ.
Мәселен, Байзақ ауданында «Әйел: денсаулық және әлеуметтік қолдау» тақырыбында ашық әңгімелесу алаңы өтті.
Кездесуде қатерлі ісіктердің алдын алу, ауруды ерте анықтау және медициналық тексеруден уақытылы өтудің маңызы талқыланды. Дәрігерлер әйелдерге қажетті түсіндіру жұмыстарын жүргізіп, акушер-гинекологтар қатысушылардың сауалдарына жауап берді. Психолог маман әйелдердің эмоционалдық жағдайы мен психологиялық қолдау мәселесіне тоқталды.
Ашық диалог форматында өткен кездесудің ерекшелігі – әйелдер өздерін алаңдатқан сұрақтарды тікелей мамандарға қойып, денсаулыққа қатысты мәселелер бойынша нақты ақпарат алды.
Осындай форматтағы кездесулер өзге аудандарда да ұйымдастырылды.
Жамбыл ауданында «Әйел денсаулығы – ортақ жауапкершілік» тақырыбында әйелдер дәрігерлік консультациясы өтті.
Қордай ауданында аудандық емхана алаңында «Әйелдер денсаулығы – басты назарда» тақырыбында әйелдерге арналған консультация ұйымдастырылып, 20 адам қамтылды.
Сарысу ауданында Жанатас қаласындағы орталық аудандық ауруханада «Ана мен баланың денсаулығы – ұлт болашағы» тақырыбында Ашық есік күні өтті. Іс-шараға 15 әйел қатысты.
Ал Мойынқұм ауданында амбулаториялық медициналық ұйымдарда әйелдерге арналған «Ашық есік» күні ұйымдастырылып, профилактикалық тексерулер мен онкологиялық және өзге де аурулардың алдын алу мәселелері бойынша түсіндіру жұмыстары жүргізілді. Шараға 15 әйел қамтылды.
Әртүрлі форматта өткен бұл жұмыстардың ортақ мақсаты бір: әйел денсаулығына қатысты мәселелерді ауру асқынған кезде емес, алдын ала анықтауға мүмкіндік беру және медициналық көмек туралы ақпаратты тұрғындарға барынша жақындату.
«Әйел өмірі үшін» ақпараттандыру айлығы аясындағы жұмыстарда осыған басымдық беріліп отыр. Бір жерде медициналық кешен ауылға барса, енді бір жерде дәрігерлер әйелдердің сұрақтарына тікелей жауап береді. Ең бастысы, профилактика мен ерте диагностика туралы ақпараттың қолжетімді болуы.
«Әділет» партиясының аудандық филиалдары ұйымдастырған кездесулер мен ашық алаңдар да осы жұмыстың қоғамдық бөлігін толықтырып отыр. Партия өкілдері мен медицина мамандарының бір алаңда бас қосуы әйелдерді толғандыратын мәселелерді тікелей тыңдап, қажетті ақпаратты дәрігерлерден алуға мүмкіндік береді.
Әйел денсаулығына көңіл бөлу – тек медициналық мәселе емес. Оның отбасы әл-ауқатына, еңбекке қабілеттілігіне және күнделікті өмір сапасына тікелей қатысы бар. Сондықтан профилактикалық тексерулерді қолжетімді ету, қажетті ақпаратты уақытылы жеткізу және әйелдің өз денсаулығына жауапкершілікпен қарауына жағдай жасау маңызды.
«Әділет» партиясы Жамбыл облыстық филиалының баспасөз қызметі