Ортақ мақсатымыз – келешегі кемел өңірді қалыптастыру

№4 бірмандаттық аумақтық сайлау округі бойынша
Сарысу аудандық мәслихатының депутаттығына кандидат
Охабеков Усен Торебекович

Өмірбаяным

Құрметті округ тұрғындары!

Мен, Охабеков Усен Торебекович, 1985 жылы 9 қарашада Жамбыл облысы, Сарысу ауданы, Жаңатас қаласында дүниеге келдім. Қазіргі уақытта Жаңатас қаласында тұрамын.
2009 жылы М.Тынышбаев атындағы Қазақ көлік және коммуникациялар академиясын «Тасымалдауды ұйымдастырушы» мамандығы бойынша тәмамдап, жоғары білім алдым.
Еңбек жолымды 2005 жылы шекара қызметінің қатарында шекарашы болып бастадым. Мемлекеттік қызметте жүріп, жауапкершілік пен тәртіпті, кәсіби біліктілік пен ұжымдық жұмыс- тың маңыздылығын меңгердім. Қызмет барысында жинақтаған тәжірибемнің нәтижесінде басқарушылық қабілетімді шыңдап, кәсіби және жеке байланыстарымды қалыптастырдым.
2024 жылдың маусым айынан бастап «Bek-2011 Construction» жауапкершілігі шектеулі серіктестігінің директоры әрі құрылтайшысы қызметін атқарып келемін. Кәсіпорынның негізгі қызмет бағыттары – қызмет көрсету, логистика және қамтамасыз ету. Қазіргі таңда компанияда 65-тен астам адам еңбек етеді.
Серіктестік құрылыс саласында белсенді жұмыс жүргізіп, оның ішінде әлеуметтік маңызы бар жобаларды жүзеге асыруға қатысып келеді. Компания қызметін ұйымдастыру, коммерциялық құрылымдарды басқару және инфрақұрылымдық бастамаларды іске асыру бағыттарында тәжірибе жинақтадым.
Кәсіби қызметім барысында өзімді жауапкершілігі жоғары, ұйымдастырушылық және басқарушылық қабілеті қалыптасқан маман ретінде көрсетуге күш салып келемін. Мемлекеттік қыз- метте жинақтаған тәжірибем мен кәсіпкерлік саладағы жұмысым алға қойылған міндеттерді жүйелі түрде жүзеге асыруға мүмкіндік беріп отыр.

Сайлауалды бағдарлама

Қадірлі сайлаушылар!

Менің ұстанымым – нақты мәселеге назар аудару, нәтижеге бағытталған ұсыныстар енгізу және тұрғындардың мүддесін қорғау. Депутаттық қызметті халық пен билік арасындағы байланысты нығайтудың, ауданның өзекті мәселелерін шешуге ықпал етудің маңызды мүмкіндігі деп санаймын.
Осы мақсатта төмендегі бағыттар бойынша жұмыс жүргізуді көздеймін.

Құрылыс және инфрақұрылым сапасына назар аудару

Ауданның көркеюі сапалы құрылыс пен қолайлы инфрақұрылымнан басталады. Сондықтан:
• Тұрғын үйлердің, әлеуметтік нысандардың және қоғамдық ғимараттардың сапалы салынуы мен уақтылы жөнделуіне қоғамдық бақылауды күшейту;
• Көшелер мен аулаларды абаттандыру, жолдардың сапасын жақсарту және жарықтандыру мәселелерін көтеру;
• Ауызсу, кәріз және инженерлік желілерді жаңғыртуға бағытталған жобалардың жүзеге асырылуына ықпал ету;
• Құрылыс жұмыстары кезінде тұрғындардың қауіпсіздігі мен қолайлылығының сақталуына назар аудару.

Жергілікті кәсіпкерлік пен өндірістік әлеуетті дамыту

Жергілікті кәсіпорындардың көбеюі аудан экономикасының нығаюына тікелей әсер етеді. Осы бағытта шағын және орта бизнестің дамуына қолайлы жағдай қалыптастыруды қолдаймын. Атап айтқанда:
• Жергілікті кәсіпкерлердің аудандық жобаларға қатысу мүмкіндіктерін кеңейту;
• Өндіріс, құрылыс, логистика және қызмет көрсету салаларындағы жаңа бастамаларды қолдау;
• Кәсіп ашуға ниетті азаматтарға мемлекеттік бағдарламалар мен қаржыландыру тетіктері туралы ақпараттың қолжетімді болуына ықпал ету;
• Жергілікті тауар өндірушілер мен қызмет көрсетушілердің әлеуетін арттыру мәселелерін көтеру.

Жұмыспен қамту және жастарға кәсіби бағыт беру

Тұрақты жұмыстың болуы – отбасы әл-ауқатының негізгі тірегі. Сондықтан аудан тұрғындарын жұмыспен қамтуға бағытталған бастамаларды қолдаймын. Жаңа кәсіпорындар мен өндіріс орындарын ашуға, жастарды сұранысқа ие мамандықтарға оқытуға және жұмысшы кадрларды даярлауға басымдық берілуі қажет. Сонымен қатар жас мамандардың еңбек нарығына бейімделуіне, тәжірибеден өтуіне және тұрақты жұмысқа орналасуына мүмкіндік жасау мәселесін көтеремін.

Қоғамдық қауіпсіздік және тұрғындардың әл-ауқаты

Шекара қызметінде еңбек еткен жылдарым қауіпсіздік пен тәртіптің қоғам өміріндегі маңызын терең түсінуге үйретті. Осы тәжірибеме сүйене отырып, аудан аумағында қоғамдық тәртіпті сақтау, құқық бұзушылықтың алдын алу және тұрғындардың қауіпсіздігін қамтамасыз ету бағытындағы жұмыстарды қолдаймын. Сондай-ақ көшелер мен қоғамдық орындарды бейнебақылау жүйелерімен жабдықтау, балалардың қауіпсіздігіне жағдай жасау және жастардың бос уақытын тиімді ұйымдастыру мәселелеріне назар аударамын.
Әлеуметтік қолдау саласында ардагерлерге, көпбалалы отбасыларға, мүмкіндігі шектеулі азаматтарға және тұрмысы төмен отбасыларға көрсетілетін көмектің тиімділігін арттыруға бағытталған ұсыныстар енгіземін. Әрбір тұрғынның лайықты өмір сүруіне мүмкіндік беретін әлеуметтік ортаны қалыптастыру маңызды.

Халықпен кері байланыс және ашықтық

Тұрғындардың пікірі ескерілмеген жерде тиімді шешім қабылдау қиын. Сондықтан сайлаушылармен тұрақты кездесулер өткізіп, олардың өтініштері мен ұсыныстарын назарға алуды басты міндеттерімнің бірі санаймын. Мәслихат отырыстарында халықты толғандырған мәселелерді көтеріп, олардың шешілу барысын бақылауға күш саламын. Жергілікті бюджет қаражатының мақсатты жұмсалуы мен аудандық бағдарламалардың орындалуына қатысты ашықтықты қолдаймын.

Құрметті сайлаушылар!

Мен үшін туған жердің дамуы – ортақ жауапкершілік. Әрбір атқарылған істің артында халықтың тұрмыс сапасы, әрбір қабылданған шешімнің артында елдің болашағы тұруы керек. Жинақтаған еңбек тәжірибем мен басқару қабілетімді Сарысу ауданының өркендеуіне жұмсауға дайынмын.
Сіздердің сенімдеріңізді ақтап, аудан тұрғындарының мүддесін қорғау жолында табандылықпен еңбек етуге ниеттімін. Бірлесе атқарған іс қана нақты нәтижеге жеткізеді. Ортақ мақсатымыз – тұрғындарға қолайлы, мүмкіндігі мол, келешегі кемел өңірді қалыптастыру!

Тапсырыс беруші: №4 бірмандаттық аумақтық сайлау округі бойынша
Сарысу аудандық мәслихатының депутаттығына кандидат Охабеков У.Т.
Кандидаттың республикалық бюджет қаражатынан жабылатын
шығыстары есебінен төленді.