Таразда жүзін жасырғандар жауапқа тартылуда

Жамбыл облысында бет-жүзді тануға кедергі келтіретін киімдерді киюге тыйым салу талабын сақтамаған азаматтар жауапкершілікке тартылып жатыр. Заңнамаға енгізілген жаңа талаптарды бұзушылар профилактикалық және рейдтік іс-шаралар аясында анықталуда.
Облыстық Полиция департаментінің берген мәліметтеріне сүйенсек, заңнама күшіне енгелі бері облыс аумағында аталған талапты сақтамағаны үшін 11 тұрғынға ескерту беріліп, 1 азамат айыппұл арқалаған. Оның ішінде Тараз қаласында 9 адам ескерту алып, 1 азаматқа айыппұл салынған.
Естеріңізге сала кетейік, 2025 жылдың 31 желтоқсанында «Қазақстан Республикасының Құқық бұзушылық профилактикасы туралы» Заңы қабылданып, биылғы 2 наурызда күшіне енген болатын. Аталған құжаттың 75-бабы, 3-тармағында қоғамдық орындарда тұлғаны көзбен тануға мүмкіндік бермейтіндей дәрежеде бетті толық жабатын киім киюге тыйым салынған. Бұл талап ауа райы жағдайларына, медициналық көрсетілімдерге, қызметтік міндеттерді орындауға, сондай-ақ спорттық және мәдени іс-шараларға қатысу жағдайларына қолданылмайды.
Аталған талапты бұзғаны үшін Қазақстан Республикасы Әкімшілік құқық бұзушылық туралы кодексінің 434-3-бабына сәйкес жауапкершілік көзделген. Алғаш рет құқық бұзғандарға ескерту жасалады, ал бір жыл ішінде қайталанса, 10 айлық есептік көрсеткіш (43 250 теңге) мөлшерінде айыппұл салынады.